Nynorskprisen for journalistar til Kjell-Erik Kallset

– Han får prisen for å ha kjempa seg til å skrive nynorsk i avisa og for kommentarar med ein stilsikker og fargerik nynorsk, seier leiar for juryen, Gry Molvær i ein pressemelding. Prisen er på 50.000 kroner og eit kunstverk, og vert delt ut på Dei Nynorske Festspela i Ørsta 28. juni.

Fyrste

Kjell-Erik Kallset er frå Tingvoll på Nordmøre. Han byrja i Arbeiderbladet (no Dagsavisen) i 1997 og var den fyrste tilsette som fekk skrive nynorsk i avisa.

– Då eg begynte i avisa for ti år sida, fekk eg beskjed om at eg aldri kom til å få skrive nynorsk der. Men da Hilde Haugsgjerd vart redaktør nokre år seinare, ba eg om å få lov til å skrive kommentarar på nynorsk. Det var kontroversielt, men redaktøren gav meg lov, og seinare har fleire journalistar i Dagsavisen nytta nynorsk, seier Kallset.

Eit paradoks

Han har fått mange reaksjonar på språket sitt, men dei negative reaksjonane kjem når han skriv bokmål.

Kallset tykkjer det er viktig at journalistar tek debatten om nynorsk med redaktørane sine.

– Norske redaktørar er høge og mørke når det gjeld ytringsfridomen og rettane til einskildindividet, men ikkje når deira eigne journalistar ber om å få skrive nynorsk. Det er eit stort paradoks for meg, seier Kallset.

Føredøme

Føremålet med Kulturdepartementet sin nynorskpris for journalistar er å fremje bruk av nynorsk i media, og årleg ære ein dyktig journalist som er eit føredøme for andre. Prisen går til ein journalist som har utmerka seg med bruk av levande og god nynorsk i media, og som gjennom arbeidet sitt har gjeve nynorsken status og innpass på nye område. Prisen vart delt ut for fyrste gong i fjor, til NRK-journalist Linda Eide.