Ida Lødemel Tvedt og May Linn Clement er begge tilsett i fast halv stilling i Dag og Tid.
Ida Lødemel Tvedt og May Linn Clement er begge tilsett i fast halv stilling i Dag og Tid.

MEDIEFOLK:

Ida Lødemel Tvedt og May Linn Clement til Dag og Tid

–Har lenge mistenkt Dag og Tid for å vere den ideelle arbeidsheimen for meg.

Publisert Sist oppdatert

Dag og Tid har tilsett Ida Lødemel Tvedt og May Linn Clement i faste stillingar, skriv avisa i ei pressemelding.

Tvedt dukka første gong opp i spaltene i Dag og Tid i 2019, og har sidan skrive reportasjar for avisa med ujamne mellomrom. No er ho tilsett i fast halv stilling.

– Eg har lenge mistenkt Dag og Tid for å vere den ideelle arbeidsheimen for meg, og eg har store planar for korleis eg skal nytte meg av takhøgda som finst i redaksjonen, seier Tvedt.

– Ida skriv godt, og ho har ei eiga tilnærming til mange saker, som både kan provosere og gje ny innsikt. Det skader heller ikkje at bestemora budde i Aasentunet, seier ansvarleg redaktør i Dag og Tid, Svein Gjerdåker.

Tvedt har gjeve ut essaysamlinga «Marianegropen» (2019), som er omsett til dansk, tysk og nederlandsk, og fekk i 2021 Arne Hestenes’ journalistpris.

May Linn Clement har teikna og skrive artiklar i Dag og Tid i ei årrekkje. No har også ho takka ja til ei fast halv stilling.

– Eg har vore knytt til avisa lenge og veit at det er ein god stad å vere. Eg er takksam for at slumpetreff i livet har leidd meg til Dag og Tid, seier Clement.

Ho har bachelorgrad i fjernsyns- og multimedieproduksjon frå Universitetet i Stavanger og har tidlegare vore lokalavisjournalist. Nyleg tok ho steget opp på standupscena som komikar.

– May Linn kan både teikne og skrive. I tillegg er ho morosam. Kva meir kan ein be om? Ho drøymde om å vere fri, utan fast tilknyting, men no har vi klart å binde henne fast til masta i Dag og Tid, seier ansvarleg redaktør Gjerdåker.

Clement vil halde fram med å arbeide frå heimstaden i Austevoll.

Powered by Labrador CMS