Kringkastingsprisen til Harald Bøe
NRKs oljemedarbeidar Harald Bøe får Kringkastingsprisen for 2006. Ved sida av heider og ære, er prisen eit grafisk blad av kunstnaren Per Kleiva.
Denne artikkelen er over ti år gammel og kan derfor inneholde utdatert informasjon.
Prisen vert delt ut på Det Norske Teatret tysdag 25. april. Kringkastingsringen har delt ut Kringkastingsprisen kvart år sidan 1978.
Kringkastingsprisen 2006 går til ein journalist som nyttar nynorsk på eit utradisjonelt område. Som oljejournalist arbeider Bøe med eit område der nynorsk, og norsk i det heile, er lite nytta. Likevel klarer denne journalisten å formidle kompliserte nyhende på eit lett og godt nynorsk, samstundes som han formidlar stoffet på ein lettfatteleg måte, heiter det i grunngjevinga.
I ei tid der fleire og fleire område vert internasjonalisert og engelsk snart vert like vanleg som norsk på enkelte område, gjer Harald Bøe eit viktig pionerarbeid for norsk fagspråk på oljefeltet.
Harald Bøe (f. 1939) er NRK sin fremste oljejournalist. Han er tilknytt økonomi- og næringslivsredaksjonen til NRK, men har tilhald i Rogaland. Harald Bøe er fødd på Fogn i Finnøy kommune utafor Stavanger. Han var rektor ved Sentralskolen i Bjerkreim i sju år, før han byrja i NRK Rogaland i 1977. Han arbeidde i Dagsnytt mellom 1984 og 1989.
Kringkastingsprisen blir delt ut til ei røyst som utmerkar seg med godt språk i radio eller fjernsyn og som på ein framifrå måte nyttar nynorsk eller dialekt i det daglege arbeidet.
