Sigbjørn Høidalen er ny redaktør i Øyposten

Styret i Øyposten har tilsett Sigbjørn Høidalen (52) som ny redaktør og dagleg leiar i avisa, skriv avisa i ei pressemelding.

– Eg takkar for tilliten og gler meg stort til å bli kjent med folk og rapportere frå livet i øygarden til Stavanger, seier påtroppande redaktør Høidalen i pressemeldinga.

Høidalen kjem frå stillinga som frontsjef og journalist i Amedia-avisa Varingen i Nittedal kommune. Han har tidlegare vore redaktør og dagleg leiar i Drangedalsposten, og har også erfaring frå aviser som Nationen og Bergens Tidende.

– Sigbjørn Høidalen har lang erfaring med å utvikle lokaljournalistikk digitalt, og er ein særs solid journalist og publisist, seier Øyulf Hjertenes, direktør i Schibsted Kyst og styreleiar i Øyposten AS.

Øyposten er lokalavis for Finnøy og Rennesøy i Rogaland. Schibsted kom inn som eigar av avisa i 2021. Han tar over etter Rune Nedrebø, som går av med pensjon til sommaren.

Høidalen er utdanna journalist frå Høgskulen i Volda. Han har også mastergrad i skogbruk frå Norges Landbrukshøyskole på Ås. I tillegg til bakgrunn frå avis, har Høidalen også vore skogbrukssjef i Valle og Bykle kommunar.

Den nye redaktøren i Øyposten er ein dedikert fløytespelar, munnharpespelar, gitarist og korist. I 2022 vann han fløyteklassa på Landskappleiken.

LES OGSÅ:

Metoo-varslene rant inn hos TV 2: – For enkelte gikk det på helsa løs