– I dag kjem eg med nokre dårlege nyheiter. Vi må kutte kostnader.
Slik opna Stavrum eit allmøte i Nettavisen 28. oktober, ifølge notatar som vart sendt til alle tilsette i ettertid.
– Amedia har svakare lønsemd enn vi hadde før pandemien, og difor har konsernet pålagt alle mediehus å auke lønsemda, står det vidare.
Rustar seg mot ei usikker framtid
Internasjonal konkurranse, auka prisar og tap i konsernet når inntektene frå papir kjem til å forsvinne er begrunninga.
– Det er berre eit spørsmål om tid, skriv Stavrum.
Han nemner samtidig at dette skjer i eit år der Nettavisen tek marknadsdelar, går mot eit bra overskot og ligg føre budsjett. Men at dette er sårbart.
– Annonsemarknaden svingar, og det meste av veksten går til internasjonale teknologigigantar som verken lagar innhald eller betaler skatt i Noreg.
Annonse
Gunnar Stavrum er sjefredaktør og administrerande direktør i Nettavisen.Foto: Roger Aarli-Grøndalen
Forventar eit overskot på 17 millionar
Ifølge e-posten forventar Amedia eit overskot på 7,5 prosent av omsetninga til Nettavisen neste år.
– Vi kan vere einige eller usamde, men det er eigaren som bestemmer kva som er kravet til lønsemd.
Stavrum forklarar at Nettavisen i år går mot eit overskot på rundt 13 millionar kroner, men at dette berre er om lag fem prosent av omsetninga. Amedia forventar at Nettavisen skal klare eit overskot på 17 millionar kroner.
Han seier at det er to måtar å kome dit, å auke inntektene eller å redusere kostnadene.
– Når vi har lagt inn realistiske forventingar til inntektene, manglar vi rundt åtte millionar kroner for å nå målet, skriv han.
– Det er ikkje så mykje å kutte lokalt i Nettavisen utanom kjøp av stoff, reiser og lønnskostnader – og det siste er det einaste som verkeleg monnar.
I første omgang prøver vi å kutte fire til fem millionar kroner.
I e-posten til dei tilsette står det at Nettavisen skal:
Kutte innkjøpt stoff med rundt to millionar kroner.
Redusere bemanninga med to–tre–fire årsverk.
– Det siste skal vi gjere ved å redusere bruk av vikarar, og ved å fylle hol i vaktplanar og eventuelt ledige stillingar ved å omdisponere ressursar internt.
Annonse
Tillbyr sluttpakkar
Stavrum fortel at målet er å redusere talet på årsverk utan oppseiinar, men ved frivillig avgang.
I følge kjelder som Journalisten har snakka med har det kome tilbod om sluttpakkar til dei som ynskjer å slutte.
Nedbemanninga vil også få konsekvensar for dei tilsette som blir igjen.
– Det betyr meir arbeid på kveld og helg for dei fast tilsette, skriv Stavrum.
Forsiktig optimisme
Sjefredaktøren forsøker å avslutte med ein viss positiv tone.
– Viss annonsemarknaden held fram med å vere god, har vi eit godt håp om at dette er nok.
Han peiker også på gode lønnsoppgjer, prisstigning og kjøpekraft på veg opp.
– Men Amedia er tydeleg på at vi må klare 7,5 prosent overskot av inntektene våre i 2026, og vil sjå an utover våren korleis det går, avsluttar han.
I ein e-post til Journalisten laurdag kveld skriv sjefredaktør Stavrum:
– Det er korrekt at vi ønsker å justere kostnadene noe for å være enda mer robust mot mulige svingninger fremover. Det er fornuftig å gjøre slike tiltak i ro og mak når økonomien er god.
