NRK-journalist får normert nynorskpris

Alf Helleviks Mediemålpris blei delt ut i dag til Vidar Eidhammer i NRK. Det melder Samlaget i ei pressemelding.

Eidhammer vart fast tilsett i Nyheitsdivisjonen i NRK i september 2014. Han gjekk ut av Nynorsk mediesenter i Førde i februar 2007, og har stort sett jobba i radionyheitene etter det.

Juryen seier mellom anna følgande om Eidhammer:

«Prisvinnaren har nærast blitt eit nynorsk varemerke, ein dagleg nynorsk-garantist i NRK sine nyheitssendingar på radio. Vidar Eidhammer er eit viktig symbol for at det nynorske normaltalemålet skal leva i det offentlege rommet.»

Juryen grunngjer vidare:

«Prisvinnaren må til dagen jobba intenst med å gjera vanskelege saker forståelege i den aller kortaste, munnlege journalistiske sjangeren – bulletengen. Det er ein krevjande jobb. Vidar Eidhammer meistrar denne oppgåva på ein framifrå måte. Bodskapen som kjem frå Eidhammers munn er alltid råd å forstå. Med si rolege og dynamiske røyst når innhaldet fram til publikum utan støy og utanomsnakk.»

Alf Helleviks mediemålpris skal gå til yngre faste nynorskbrukarar i radio og TV som legg vekt på å dyrke eit normalisert, nynorsk talemål. Prisen, på 25.000 kroner, har blitt delt ut sidan 1998.

Juryen har bestått av Magni Hjertenes Flyum, Sølve Rydland og Geirmund Henjum.

LES OGSÅ:

Gamer.no-journalist får nynorskpris