Wolasmal kritisk til utanrikstilbodet: – Eit skrikande behov

• Få nyhetsbrev fra Journalisten.

– Eg trur det er eit skrikande behov for fleire utanriksflater også i NRK.

Det seier Wolasmal i Journalistens podkast.

Han er gjest saman med Annika Momrak, som er aktuell med den nye NRK-serien «Urix X Annika».

Wolasmal håpar serien kan bidra til at fleire får interesse for utanriksjournalistikk. Samtidig meiner han NRK burde satse på langt fleire slike program.

– Vi har eitt program i NRK som er dedikert til utanriks akkurat no, og det er Annika sitt program, seier han.

Viser til Civita-undersøking

Wolasmal viser til tankesmia Civita, som har samanlikna nyheits- og aktualitets­tilbodet til NRK, danske DR og svenske SVT og SR.

– Vi i NRK kjem dårlegast ut når det gjeld programflater på utanriksfeltet, seier Wolasmal.

I notatet konkluderer Civita med at dei danske og svenske allmenn­SSkringkastarane har eit meir omfattande og variert tilbod av program som går i djupna på utanriksnyheiter.

«Det er slåande kor mykje dårlegare NRK er på utanriksfeltet», skriv Aslak Versto Storsletten i Civita. 

– Eg trur absolutt det er behov for fleire program dedikerte til utanriksjournalistikken, med tanke på det ragnaroket vi er vitne til rundt omkring i verda, seier Wolasmal.

Han viser til den urolege verdssituasjonen, med krig og konflikt i mellom anna Ukraina og Midtausten, og spenningane mellom Kina og USA.

Fleire program i nabolanda

Riktignok har Civita kun sett på det tradisjonelle tv- og radiotilbodet, og ikkje utanriksjournalistikken generelt.

Dei peiker på at danskane har TV-program som «Horisont», «Krigens døgn», «Trumps USA» og «Verdenssituationen med Clement». I tillegg til «Stjerner og striber» og «Verden ifølge Gram» på radio og podkast.

Fekk tilsnakk av korrespondenten: – På verst tenkeleg tidspunkt

Svenskane har det faste tv-programmet «Utrikesbyrån», og podkastar som «Konflikt», «USApodden» og «Europapodden».

NRK har på si side berre «Urix» på radio. Urix var tidlegare eit fast tv-program, no er det «Annika x Urix» som er einaste tv-konseptet, med fire episoder.

Momrak seier at det ikkje er avgjort om det vil bli meir, men at ho sjølv er positiv. 

Også kommunikasjonsansvarleg i NRK, Camilla Sand, seier at dei må kome tilbake til kor vidt det vert fleire sesongar av programmet. 

NRK avviser kritikken

NRK har tidlegare avvist Civita sine konklusjonar.

I eit debattinnlegg i Aftenposten skriv nyheitsdirektør Marius Tetlie og strategidirektør Jørgen Heid at det ikkje er tilstrekkeleg å samanlikne talet på programtitlar for å vurdere NRKs innsats.

Dei viser til at NRK har dagleg utanriksdekning i Dagsrevyen, fordjupande journalistikk i fleire nyheits- og aktualitetsprogram og ei planlagd utviding av korrespondentnettverket.

Dei trekte også fram «Urix X Annika» som eit døme på at NRK utviklar nye måtar å formidle utanriksjournalistikk på.

– Vårt store dilemma

Wolasmal fortel i Journalistens podkast at det kan vere krevjande å få publikum til å engasjere seg i viktige utanrikssaker.

– Det er vårt store dilemma som nyheitsjournalistar. Vi lagar journalistikk om det vi trur er viktige saker. Og så opplever vi kanskje, når vi legg ut ei nettsak om noko forferdeleg som skjer i Israel eller på Gazastripa, at det er få som klikkar seg inn.

I podkasten deler han og Momrak fleire tankar om utanriksjournalistikken og kva dei lærte av kvarandre under opphaldet i Israel: 

Journalistens podkast er tilgjengeleg på Spotify, iTunes, YouTube og Podme.